އިންސާނާ ދުނިޔެއަށް ފޮނުއްވާފައިވަނީ ވަކި މަޤްޞަދެއްގައި ކަމަށްވާތީ އިސްލާމްދީނުގައި ވަނީ ރަހްބާނިއްޔަތު (އަޅުކަންކުރުމުގެ ނަމުގައި މީހަކާއި ނުއިނދެ މުޅި ޢުމުރު ހޭދަކޮށްލުން) މަނާކުރައްވާފައެވެ. އަދި ކައިވެނިކޮށް، އުފާވެރި ޒަވާޖީ ޙަޔާތެއް ވޭތިކުރުމަށް ބާރުއަޅުއްވާފައެވެ. އެހެންކަމުން، ތިމާގެ ޙަޔާތުގެ ބައިވެރިއަކު އިޚްތިޔާރު ކުރުމަކީ ނުހަނު މުހިއްމު ކަމެކެވެ. އިންސާނެއްގެ ޙަޔާތުގައި އޭނާ ނިންމަންޖެހޭ އެންމެ މުހިއްމު އެއް ނިންމުމެވެ. މިކަމަށްޓަކައި ބަލަން ޖެހޭ ކަންތަކަކީ ކޮބައިތޯއެވެ؟
ކައިވެނީގެ ގުޅުމެއް ފަށާއިރު، އެކަމުގައި ޢާއްމުކޮށް އިސްނަގަނީ ފިރިހެނުންނެވެ. އެހެންކަމުން، ތިމާގެ ޙަޔާތުގެ ބައިވެރިޔާ ހޯދަން މަސައްކަތްކުރާ ފިރިހެނުންނަށް އިތުރު ރަސޫލު صلى الله عليه وسلم ގެ ވަރަށް ފުރިހަމަ އިރުޝާދެއް އައިސްފައި ވެއެވެ. މާތް ﷲ ރުއްސުންލެއްވި އަބޫހުރައިރާގެ އަރިއަހުން އަލްބުޚާރީއާއި މުސްލިމް ރިވާކުރައްވާފައި ވެއެވެ. ރަސޫލުﷲ صلى الله عليه وسلم ޙަދީޘްކުރެއްވިއެވެ. تنكح المرأة لأربع لمالها ولحسبها ولجمالها ولدينها فاظفر بذات الدين . تربت يداك (އަންހެނަކާއި ކައިވެނި ކުރެވެނީ ހަތަރު ކަމަކަށް ޓަކައެވެ. އޭނާގެ މުދަލަށް ޓައެވެ. ނަސަބަށް ޓަކައެވެ. ރީތި ކަމަށްޓަކައެވެ. އަދި ދީންވެރިކަމަށް ޓަކައެވެ. ފަހެ، ދީންވެރި އަންހެނަކު ކާމިޔާބު ކުރާށެވެ. ތިބާއަށް އުފާވެރިކަން ލިބޭހުއްޓެވެ.) އެހެންކަމުން، ތިމާގެ ބައިވެރިއަކަށް އިޚްތިޔާރުކުރާ މީހާގެ އެންމެ މުހިއްމު ސިފައަކަށް ވާންޖެހެނީ ދީންވެރިކަމެވެ.
ފިރިމީހާ އިޚްތިޔާރުކުރުމުގައި އަންހެންމީހާގެ ފަރާތުންވެސް އޭނާގެ ދީންވެރިކަމާއި އަޚްލާޤަށް ބަލަންޖެހެއެވެ. އަބޫޙާތިމް އަލްމުޒްނީގެ އަރިއަހުން ރިވާވެފައިވާ ޙަދީޘެއްގައި ވެއެވެ. ރަސޫލުﷲ صلى الله عليه وسلم ޙަދީޘުކުރެއްވިއެވެ. إذا أتاكم من ترضون دينه وخلقه فزوجوه (ތިޔަބައިމީހުންގެ ގާތަށް އެމީހެއްގެ ދީނާއި އަޚްލާޤާއި މެދު ތިޔަބައިމީހުން ރުހޭ މީހަކު (ކައިވެންޏަށް އެދިގެން) އަތުވެއްޖެނަމަ އޭނާގެ ކައިވެނިކޮށްދޭށެވެ.)
ދީންވެރިކަމުގެ އިތުރުން ކުދިން ލިބޭ، ބައިވެރިޔާ ދެކެ ލޯބިވާ މީހަކު އިޚްތިޔާރުކުރުމަށް ވެސް ދީނުގައި ބާރު އަޅުއްވާފައި ވެއެވެ. މަޢްޤަލް ބްނު ޔަސާރްގެ އަރިއަހުން އަބޫދާވޫދު ރިވާކުރައްވާފައި ވެއެވެ. މީހަކު އައިސް ރަސޫލުﷲ صلى الله عليه وسلم ގެ އަރިއަހުގައި ދެންނެވިއެވެ. ތިމަން މިއުޅެނީ ރަނގަޅު ނަސަބެއްގެ ވެރި، ރިވެތި މީހަކާ އިންނާށެވެ. އެކަމަކު އޭނާއަކީ ދަރިން ނުލިބޭ މީހެކެވެ. ދެން އިތުރު އެކަލޭގެފާނު އެކަން މަނާކުރެއްވިއެވެ. އަދި ޙަދީޘްކުރެއްވިއެވެ. تزوجوا الودود الولود (ފިރިމީހާދެކެ ލޯބިވާ ކުދިން ގިނައިން ލިބޭ މީހަކާއި އިންނާށެވެ.)
އަލަތު ކައިވެންޏެއް ކުރާ ފިރިހެނަކު ނަމަ ބިކުރުވެރި އަންހެނަކާއި އިނުމީވެސް އެދެވިގެންވާ ކަމެކެވެ. މާތް ﷲ ރުއްސުންލެއްވި ޖާބިރު ބްނު ޢަބްދުﷲގެ އަރިއަހުން އަލްބުޚާރީއާއި މުސްލިމް ރިވާކުރައްވާފައި ވެއެވެ. ތިމަން މީހަކާ އިން ޚަބަރު ލިބިވަޑައިގެން ރަސޫލުﷲ صلى الله عليه وسلم ސުވާލުކުރެއްވިއެވެ. ބިކުރުވެރި އަންހެނަކާ ހެއްޔެވެ؟ ނުވަތަ މީހަކާ އިނދެފައި ހުރި މީހަކާ ހެއްޔެވެ؟ ތިމަން ދެންނެވީމެވެ. މީހަކާ އިނދެފައި ހުރި މީހަކާއެވެ. އެހިނދު އެކަލޭގެފާނު ޙަދީޘްކުރެއްވިއެވެ. فهلا بكراً تلاعبها وتلاعبك (ތިބާއާއި އޭނާއާއި ދެމީހުން އެކަކު އަނެކަކާއި ކުޅެ އުފާލިބިގަތުމަށް ބިކުރުވެރި އަންހެނަކާ ނުއިނީ ކީއްވެހެއްޔެވެ؟)
އިންނާނެ މީހަކު އިޚްތިޔާރުކުރާއިރު ޢާއިލީ ގޮތުން މާ ގާތް ނޫން، ދުރު މީހަކު އިޚްތިޔާރުކުރުން އެދެވިގެންވާ ކަމަށް ޢިލްމުވެރިން ވިދާޅުވެއެވެ. މިކަމުގެ ފައިދާ މިޒަމާނުގެ ޖެނެޓިކް ޢިލްމުން ސާބިތުވެފައި ވެއެވެ.
