5 – ސާދާ ދިރިއުޅުމެއްގެ ނަތީޖާ

އަހަރެންގެ ޚިޔާލުގައި ގިނަ މައިންބަފައިންނަކީ ސާދާ ދިރިއުޅުމުގެ ނަތީޖާ އަކީ ކޮބައިކަން ނޭނގޭ މީހުންނެވެ. ސާދާ ދިރިއުޅުމަކަށް ދާންޖެހޭ ގިނަ ފަހަރު ސާދާ ދިރިއުޅުމަކަށް ދާން މަޖުބޫރުވަނީ އެހެން އެއްވެސް ގޮތެއް ނެތުނީމައެވެ. މައިންބަފައިން ކުރާ ކަންކަން ކުދީން ކޮޕީ ކުރާނެއެވެ. ކޮޕީ ނުކުރާ ހާލަތެއްގައިވެސް މައިންބަފައިން ކުރާ ކަންކަމުގެ އަސަރު ކުދީންގެ ސިކުނޑީގައި ހަރުލާފައި ހުންނާނެއެވެ. މިފަދަ މައިންބަފައިންގެ ދަރީންނަކީ ޢަމަލީ މައިދާނުގައި ސާދާ ދިރިއުޅުމަކަށް ދެވޭނެ ބައެއް ނޫނެވެ.

ސާދާ ކޮށް އުޅުމަކީ ކޮބައި ހެއްޔެވެ؟ ސާދާ ކޮށް އުޅުމަކީ ދިރިއުޅުމުގެ ސަބަބާއި މުހިންމުކަން ދެނެގަނެ، އެކަމަށް އެންމެ އިސްކަން ދިނުމާއެކު ބާކީ ހުރި ކަންކަމަކީ އޭގެ ފަހަތަށް އަންނަންޖެހޭ ކަންކަން ކަމުގައި ހެދުމެވެ.

ތިމާގެ ޝަޚްސިއްޔަތު ރަނގަޅަށް ބިނާ ކުރުމަކީ ކޮންމެ މީހަކަށްވެސް ވަރަށް މުހިންމު ކަމެކެވެ. އިންސާނާގެ ކިބައިގައި މާތް ރަސްކަލާނގެ ވަނީ ވަރަށް ގިނަ ހުނަރު ލައްވާފައެވެ. މިއީ ދެނެގަންނަން ޖެހޭ ކަމެކެވެ. މިކަން ހޯދާ ބަލައި ދެނެގަނެ، ތިމާ މި ދިރިއުޅެނީ ކީއްކުރަންކަން ދެނެގަންނާށެވެ. ހޯދުންތަކާއި ތަޖުރިބާގެ އަލީގައި ތިމާގެ ސިކުނޑި ތަރައްގީ ކުރާށެވެ. އަދި ތިމާގެ ލަނޑުދަނޑި ހާސިލު ކުރުމަށްޓަކައި ލިބެންހުރި ވަސީލަތާއި ވަގުތު ބޭނުން ކުރާނެ ގޮތް ދަސްކުރާށެވެ.

ރާވާފައިވާ ގޮތަށް ކަން ކުރުމަކީ އެންމެ ފުރިހަމަ ގޮތެވެ. މިގޮތަށް ކަން ކުރުމަށްޓަކައި އެންމެ މުހިންމު ކަމަކީ ސާދާ ދިރިއުޅުމެއް އުޅުމެވެ. ސާދާ ކޮށް އުޅުމުން ބޭކާރު ޚަރަދުތަކުން ސަލާމަތްވުމާއެކު ނުބައި ވިސްނުންތަކުން ސިކުނޑި ސަލާމަތް ވާނެއެވެ. ސިކުނޑި ބަނދެވިފައި އޮތުމުގެ ބަދަލުގައި ތަރައްގީގެ ވިސްނުމަށް ސިކުނޑި ހުޅުވިގެންދާނެއެވެ.

ޚިޔާލު ފޯމު

ޚިޔާލު ފައުޅު ކުރެއްވުމުގައި ދީނީ، ޤާނޫނީ އަދި ސުލޫކީ މިންގަނޑުތަކަށް ސަމާލުކަން ދެއްވުން އެދެމެވެ.