މަވްލާނާ ވަޙީދުއްދީން ޚާން
ތަރުޖަމާ: ޢަބްދުﷲ ނަޢީމް އިބްރާހީމް
އިންސާނާގެ ކިބައިގައި ވަނީ ބުއްދިއާއި ޝުއޫރުގެ ލައްވައިފައެވެ. އޭނާގެ އެތެރެހަށީން އިވޭ އަޑު އެހުމާއި ނާހައި ހަވާނަފުސަށް ހެއްލިގަތުމުގެ އިޚްތިޔާރު ވަނީ ދެއްވައިފައެވެ.
ކީރިތި ޤުރްއާނުގެ 7 ވަނަ ސޫރަތުގައި ﷲ ވަޙީކުރައްވައިފައި ވެއެވެ. [އަދި ކަލޭގެފާނުގެ ވެރިރަސްކަލާނގެ އާދަމުގެދަރިންގެ ކިބައިން އެއުރެންގެ ބުރިކަށިތަކުން އެއުރެންގެ ދަރިފަސްކޮޅު ނެރުއްވައި އެއުރެންގެ އަމިއްލަ ނަފުސުތަކުގެ މައްޗަށް އެއުރެން ހެކިކުރެއްވިހިނދު ހަނދުމަކުރާށެވެ! (އެކަލާނގެ ވަޙީކުރެއްވިއެވެ.) ތިޔަބައިމީހުންގެ ވެރިރަސްކަލާނގެ ކަމުގައި، ތިމަންރަސްކަލާނގެ ވޮޑިގެން ނުވަންހެއްޔެވެ؟ އެއުރެން ދެންނެވޫއެވެ. ނޫނެކެވެ. (އިބަރަސްކަލާނގެއީ، އަޅަމެންގެ ވެރިރަސްކަލާނގެއެވެ.) އެކަމަށް އަޅަމެން ހެކިވެއްޖައީމުއެވެ. (އެކަން އެހެންވީ) މިކަމާމެދު ޣާފިލުވެގެންވާ ބަޔަކު ކަމުގައި ހަމަކަށަވަރުން، ތިމަންމެންވީމުއޭ، ގިޔާމަތްދުވަހުން ތިޔަބައިމީހުން ބުނާނެކަމަށްޓަކައެވެ. ނުވަތަ ތިޔަބައިމީހުން ބުނާނެކަމަށްޓަކައެވެ. ޝަރީކުކޮށްއުޅުނުކަން ކަށަވަރީ، މީގެކުރިން ތިމަންމެންގެ ކާބަފައިންނެވެ. ތިމަންމެންވީ، އެއުރެންގެ ފަހުން އައި ދަރިފަސްކޮޅެއްކަމުގައެވެ. ފަހެ، ބާތިލުގޮތަށް އުޅުނުމީހުން ކުޅަކަންތަކަށްޓަކައި، ތިމަންމެން ހަލާކުކުރައްވަނީތޯއެވެ؟ ތިމަންރަސްކަލާނގެ އާޔަތްތައް ބަޔާންކޮށްދެއްވަނީ، އެފަދައިންނެވެ. އަދި އެއުރެން (ހައްގުގެ މަގަށް) އެނބުރި އައުމަށްޓަކައެވެ.] (އަލްއަޢްރާފް: 172 – 174)
މި ވާހަކަފުޅުން ސާފުވާ ގޮތުގައި އިންސާނާގެ ހެއްދެވި އޭނާގެ ވެރިފަރާތުގެ ޝުއޫރާއި ބުއްދީީގެ ޖައުހަރު އޭނާގެ ކިބައިގައި ލައްވައިފައި ވަނީ ދުވަހަކުވެސް އޭނާޔާ ވަކިނުކުރެވޭ މިންވަރަށެވެ. މި ޒަމާނަށް ބަލާނަމަ، ރޫސީވިލާތަށާއި ތުރުކީވިލާތަށް ބަލައިލާށެވެ. ދީނާ ކަނޑައެޅިގެން ދެކޮޅު މާހައުލެއް އުފެއްދުމާއެކުވެސް އިންސާނާގެ ފިތުރަތަކަށް އެއްވެސް ބަދަލެއް ނާދެއެވެ. ސަބަބަކީ ﷲ ތަޢާލާ ދެނެގަތުމުގެ ޝުއޫރު ނުވަތަ ހެވާއި ނުބައި ވަކިކޮށްގަތުމުގެ ގާބިލިއްޔަތު އިންސާނާގެ ކިބައިގައި، އޭނާގެ ތަބީއީ ސިފައެއްގެ ގޮތުގައި ލައްވައިފައިވުމެވެ.
އިންސާނުންނާއި ޖަނަވާރާ ދެމެދު މައިގަނޑު ތަފާތެއް ހުރެއެވެ. އެއްވެސް ޖަނަވާރަކަށް އޭގެ ތަބީއަތާ ޚިލާފެއް ނުވެވޭނެއެވެ. އެޔަށް މަޖުބޫރުވެފައި ވަނީ އޭގެ ކިބައިގައި ލައްވައިފައިވާ ގުދުރަތީ ތަބީއަތާ އެއްގޮތަށް އަމަލުކުރާށެވެ. އިންސާނާ މުޅީން ތަފާތެވެ. ޝުއޫރާއި ފިތުރަތުގެ ހަމަތަކާ ދެކޮޅު ނުހެދޭނޭ ބައެއް ކަންތައް ހުރުމާއެކުވެސް އަމަލުތަކުގައި އިންސާނާއަށް ވަނީ މިނިވަންކަންް ދެއްވައިފައެވެ. އިންސާނާގެ ކުރިމައްޗަށް ކަމެއް އައުމާއެކު އެ ކަމެއްގެ ރަނގަޅު ގޮތަކީ ކޮބައިކަމާއި ނުބައި ގޮތަކީ ކޮބައިކަން އަންގައި އޭނާގެ ބުއްދިއާއި ޒަމީރު ސިގުނަލް ދޭން ފައްޓައެވެ. ހެޔޮނުބައި ރަނގަޅަށް ވަކިވާނޭގޮތް އެނގުމާއެކު، ރަނގަޅު ގޮތް އިޚްތިޔާރުކުރުން ލާޒިމުވީމާވެސް އޭނާ އެކަން އެއްފަރާތް ކޮށްލުމަށް ފަހު ހިތަށް އެރި ގޮތަކަށް ކަންތައް ކުރެއެވެ.
އިންސާނާގެ އިމްތިހާނު ފެށޭ ހިސާބަކީ މިއީއެވެ. ނަރަކައަށް ވެެއްދެވުމާއި ސުވަރުގެ ވެއްދެވުން ބިނާ ވެފައި އޮންނަނީީ މި އިމްތިހާނުގެ މައްޗަށެވެ. ﷲ ގެ ބަސްފުޅު އަޑުއެހުމަށްފަހު ގުދުރަތުގެ ހިމޭން ބަހުރުވައިން އޭނާއަށް ދޭ އިރުޝާދުގެ މައްޗަށް އަމަލުކުރާ މީީހާއަކީ މި އިމްތިހާނުން ފުރިހަމައަށް ފާސްވާ މީހާއެވެ. މަރުވުމަށް ފަހު އޭނާގެ މައްޗަށް ސުވަރުގޭގެ ދޮރުކޮޅުތައް ހުޅުވައިލެވޭނެއެވެ.
މި ބުނެވުނު ގުދުރަތުގެ އަޑަކީ ﷲ އިންސާނާގެ މައްޗަށް ބާވައިލައްވާ ދަލީލެކެވެ. އެހެންވީމާ ތިމަންނާއަކަށް އެނގިފައެއް ނެތޭޭ ބުނެ ބަހަނާ ދެއްކުމަކީ އެއްވެސް މީީހަކަށް ކުރެވޭނޭ ކަމެއް ނޫނެވެ. އަދި ތިމަންމެން ކަންތައް ކުޅައީ ކާބަފައިން ކަންތައްކުޅަ ގޮތަށޭ ބުނެފައި ރެކިގަނެވޭކަށްވެސް ނޯންނާނެއެވެ. އިންސާނާ ދުނިޔެއަށް އަންނަނީ ﷲ ލައްވައިފައިވާ ޝުއޫރަކާއެކުގައި ކަމަށް ވެފައި، ހާލަތު ކޮންމެ ގޮތަކަށް ބަދަލުވެގެން ދިޔަކަމުގައި ވިޔަސް އެ ޝުއޫރަށް ބަދަލެއް ނާންނަކަމުގައިވާއިރު ޖަހާލަތާއި ޣަފްލަތުގެ މަގުން ހިނގައިގަންނާން އިންސާނާގެ ކިބައިގައި އޮންނާނީ ކޮން އުޒުރެއް ހެއްޔެވެ؟
