އިޙްސާންތެރި ކަމަކީ މަތިވެރި މާތްސިފަތަކުގެ ތެރެއިންވާ ސިފައެކެވެ. އަދި ފުރިހަމަ އިންސާނެއްގެ ކިބައިގައި ހުރުން ކޮންމެހެން ބޭނުންތެރި ސިފައެކެވެ. އިޙްސާންތެރި ވެވޭނެގޮތްތައް ވަރަށް ގިނައެވެ. ތިމާކަހަލަ އިންސާނުންނާއި މެދު އިޙްސާންތެރި ވެވޭނެ ގޮތްތަކުގެ ތެރޭގައި އެމީހެއްގެ ބަހާއި މުދަލުން އެހީތެރިވުމާއި ޢިލްމާއި ހުނަރުން އެހީތެރިވުން ވެއެވެ. އަދި ޙަޔަވާނުންނާއި ދޫނި ސޫފާސޫތްޕަށް ވެސް ހެޔޮކޮށް ހިތައި އެހީތެރިވުމަކީ އިޙްސާންތެރިކަމުގެ ތެރެއިން ހިމެނޭ ކަމެކެވެ. މާތްﷲ ހުރިހާ އެއްޗެއްގެ މައްޗަށް އިޙްސާންތެރިކަން މިންވަރު ކުރެއްވިކަމާއި ގަތުލުކުރާނަމަ ނުވަތަ ޛަބަޙަކުރާނަމަ ރަގަޅަށް އެކަންކުރަމަށާއި އަދި ޛަބަޙަ ކުރާ ވަޅީގެ މިޔަ ތޫނުކޮށް ޛަބަޙަ ކުރެވޭ ޖަނަވާރު ފަސޭހަކަމާއިއެކު ޛަބަޙަ ކުރުމަށް ކީރިތިރަސޫލާ އެންގެވި އެންގެވުން އެކަލޭގެފާނުގެ މިޙަދީޘުފުޅުން ވަރަށް ފުރިހަމައަށް އެގިގެން ދެއެވެ. "إنَّ اللهَ كَتَبَ الْإِحْسَانَ عَلَى كُلِّ شَيْءٍ فإذا قَتَلْتُمْ فأحْسِنُوْا الْقَتْلَةَ وَإذا ذَبَحْتُمْ فأحْسِنُوْا الذّبْحَةَ وَلْيُحِدُّ أحَدُكُمْ شفْرَتَهُ وَلْيُرِحْ ذَبِيْحَتَهُ " رواه مسلم
މާތްﷲ، އެކަލާގެ ނޫންފަރާތަކަށް އަޅުކަން ނުކުރުމަށް ބަނީ އިސްރާއީލު މީހުން ކުރެން މީޘާޤު ހިއްޕެވި ހިނދު ވަނީ މައިން ބަފައިންނާއި ގާތްތިމާގެ މީހުންނާއި ޔަތީމުންނާއި މިސްކީނުންނަށް އިޙްސާންތެރިކޮށް ހިތުމަށް ވެސް މީޘާޤުހިއްޕަވާފައެވެ. އަދި މީސްތަކުންނާއި ރީތިބަހުން މުޢާމަލާތްކުރުމަށާއި ނަމާދު ޤާއިމުކޮށް ޒަކާތް ދިނުމަށްވެސް އަމުރުކުރައްވާފައިވެއެވެ. މީސްތަކުންނަށް އެކަން އަންގަވައި ކީރިތި ޤުރްއާނުގައި މާތްﷲ ވަޙީކުރައްވާފައިވަނީ ( وَإِذْ أَخَذْنَا مِيثَاقَ بَنِي إِسْرَائِيلَ لاَ تَعْبُدُونَ إِلاَّ اللّهَ وَبِالْوَالِدَيْنِ إِحْسَاناً وَذِي الْقُرْبَى وَالْيَتَامَى وَالْمَسَاكِينِ وَقُولُواْ لِلنَّاسِ حُسْناً وَأَقِيمُواْ الصَّلاَةَ وَآتُواْ الزَّكَاةَ ثُمَّ تَوَلَّيْتُمْ إِلاَّ قَلِيلاً مِّنكُمْ وَأَنتُم مِّعْرِضُونَ ) البقرة: 83
މިއާޔަތުގައި މައިންބަފައިންނަށް އިޙްސާންތެރިކޮށް ހިތުމަށް އަންގަވާފައިވާ އެންގެވުމުގައި ހުރިހާވައްތަރެއްގެ އިޙްސާންތެރިކަމެއް ހިމެނެއެވެ. ބުނާ ބަހުން ނުވަތަ ކުރާ ކަމަކުންވެސް އިޙްސާންތެރި ވެވިދާނެއެވެ. އަދި މާތްﷲ ވަނީ މައިންބަފައިންނަށް ނުބައިކޮށް ހިތުން ނަހީ ކުރައްވާފައެވެ.
އިޙްސާންތެރިކަމަކީ މާތް ﷲ ގެ ސިފަފުޅަކަށްވީ ހިނދު އެކަލާގެ ވަނީ އިންސަނާއަށް ވަރަށް ބޮޑަށް އިޙްސާންތެރިވެ ވޮޑިގެންފައެވެ. އަދި އެކަލާގެ އިންސާނާއަށް އިހްސާންތެރިވެ ވޮޑިގަތްފަދައިން އެއިންސާނާ ތިމާކަހަލަ އަނެއް އިންސާނާއަށް ވެސް އިޙްސާންތެރިވުމަށް އަމުރުކުރައްވާފައިވެއެވެ. އަދި ބިންމަތީގައި ފަސާދަ ނުކުރުމަށް އަންގަވައި އެފަދަ މީހުންނަށް މާތްﷲ ލޯބިވެ ވޮޑިގެން ނުވާކަން ވެސް އަންގަވާފައި ވެއެވެ. މާތް ﷲ ވަޙީކުރައްވަނީ ( وَابْتَغِ فِيمَا آتَاكَ اللَّهُ الدَّارَ الآخِرَةَ وَلا تَنسَ نَصِيبَكَ مِنَ الدُّنْيَا وَأَحْسِن كَمَا أَحْسَنَ اللَّهُ إِلَيْكَ وَلا تَبْغِ الْفَسَادَ فِي الأَرْضِ إِنَّ اللَّهَ لا يُحِبُّ الْمُفْسِدِينَ ) القصص: 77
އިޙްސާންތެރިކަމަކީ މުހިއްމު، ބޭނުންތެރި ސިފައެއްކަމާއި މާތްﷲގެ ރަޙްމަތްވަނީ އިޙްސާންތެރިންނާއި އެކުގައިކަން އެކަލާގެ ވަނީ އިންސާނުންނަށް އަންގަވާފައެވެ. އަޢުރާފު ސޫރަތުގެ މިއާޔަތަށް ވިސްނާލުމުން އެހަޤީޤަތް ވަރަށް ފުރިހަމައަށް ހާމަވެގެން ދެއެވެ. ( إِنَّ رَحْمَتَ اللّهِ قَرِيبٌ مِّنَ الْمُحْسِنِينَ ) الأعراف: 56 – މާނައަކީ ހަމަކަށަވަރުން ﷲ ގެ ރަޙްމަތްފުޅު ވަނީ އިޙްސާންތެރިންނާއި ގާތުގައެވެ. މިއިން ދޭހަވަނީ އިޙްސާންތެރިވުމަކީ އިންސާނާ ކޮންމެހެންވެސް ކުރަންޖެހޭ ކމެއްކަމާއި އިޙްސާންތެރިވުމުން އޭނާއަށް ޘަވާބު ލިބި މާތްﷲ ގެ ރަޙްމަތާއި އެމީހަކު ގާތްވާނެކަމެވެ. އަދި އިޙްސާންތެރިޔާ ވާނީ އޭނާއަށް މާތްﷲ ނުފެނުކަމުގައި ވިޔަސް މާތްﷲ އޭނާ ދެކެވޮޑިގެންވާނެ ކަމުގެ ޔަޤީންކަމާއިއެކުގައެވެ.
